Jan Beitohaugen Granli er ein hardingfelespelemann frå Valdres. Han har runda 31 år, og spelt i 24 av dei, mellom anna i lære hjå Trygve Bolstad, Tore Bolstad, Harald Røyne, Terje Chr Hansen og Olav Jørgen Hegge. - Tradisjonsmessig spelar eg det meste frå Valdres, men har dei siste åra konsentrert meg mest om spelet frå Øystre Slidre, seier han sjølv.

Jan Beitohaugen Granli har heile 5 landskappleiksigrar i hardingfele klasse A, og har òg vunne Fanitullprisen på Den Norske folkemusikkveka tre gonger.  Han har gjeve ut 2 CD-ar: Lite nemmar (2003) og På Beitohaugen (2010), båe på plateselskapet ta:lik. Han jobbar til dagleg som hardingfelelærar i Kulturskulen i fire kommunar i Valdres, og har spelt på mange kurs i inn- og utland, både som dansespelemann og som musikklærar.

Aftenposten kalte På Beitohaugen for “inspirerte toner”, og skreiv m.a.: “Spillet er levende og følsomt, direkte, enkelt og usminket. Klangen i fela er altomfavnende, mens tonene breier grunnen for en framifrå lytteropplevelse.” Dagsavisen nøyde seg med å slå fast at utgjevinga var “som smidd til Spellemannprisen”. Vi kan kanskje seie det endå litt enklare: Under Folkelarm 2011 får du rett og slett høyre ein meisterspelemann.

Jan Beitohaugen Granli | hardingfele